“Araz” supermarketlər şəbəkəsi 18 yaşdan yuxarı şəxslər arasında “Tullantıdan yarat” adlı müsabiqə keçirib. “Yaşıl dünya naminə həmrəylik ili” çərçivəsində, həmçinin BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyası - “COP29”un ölkəmizdə keçirilməsini nəzərə alaraq təşkil olunan müsabiqənin məqsədi ekoloji məsələlərə diqqət çəkmək, tullantıların təkrar emalını təşviq etməkdir. Məqsəd şirkətimizin bu mövzuya göstərdiyi diqqəti vurğulamaqla yanaşı, insanların tullantılardan sənət əsəri hazırlamasına, tullantıları dəyərləndirməsinə istiqamətləndirməkdir.
“Təbiəti birlikdə qoruyaq” mövzusuna əsasən hazırlanan əsərlərdə plastiklər, şüşələr, metal qablar, kağız tullantılar, kartonlar və digər təkrar emal olunan materiallardan istifadə edilib. Münsiflər heyəti tərəfindən seçilən əl işləri Ümumdünya Təmizlik Günü ərəfəsində qaliblərin iştirakı ilə sərgilənib. Müsabiqənin qaliblərinə diplom, pul mükafatı, hədiyyələr, həmçinin həvəsləndirici yer tutan iştirakçılara sertifikat, “Araz” müştəri kartı və hədiyyələr təqdim olunub.
