Veysəloğlu Şirkətlər Qrupuna (VŞQ) daxil olan “Araz” supermarketlər şəbəkəsi əməkdaşlarının peşəkar inkişafının dəstəklənməsi, korporativ təcrübənin gücləndirilməsi və şirkətdaxili istedadların inkişaf etdirilməsi məqsədilə yenilənmiş “Araz Akademiyası”nı istifadəyə verib.
Akademiyanın açılış mərasimində İdarə Heyətinin sədri Rəşad İbrahimov, İdarə Heyətinin üzvləri və şirkətin digər rəhbər şəxsləri iştirak ediblər. Tədbir çərçivəsində iştirakçılara Akademiyanın yenilənmiş infrastrukturu, təlim imkanları və qiymətləndirmə proseslərində tətbiq olunacaq müasir yanaşmalar barədə məlumat verilib.
Pərakəndə satış sektorunda insan kapitalının inkişafına və davamlı öyrənmə mühitinin formalaşdırılmasına xidmət edən “Araz Akademiyası”nda 10 interaktiv təlim otağı və texnoloji qiymətləndirmə mərkəzi yaradılıb.
Müasir təlim otaqları həm mağaza, həm də mərkəzi ofis əməkdaşlarının peşəkar və fərdi inkişafına yönəlmiş müxtəlif proqramların təşkilinə imkan verir. Texnoloji imkanlarla təchiz edilmiş qiymətləndirmə mərkəzlərində isə əməkdaşların bacarıqlarının, inkişaf potensialının, liderlik bacarıqlarının və rəqəmsal biliklərinin obyektiv meyarlar əsasında qiymətləndirilməsi nəzərdə tutulur.
Açılış mərasimində çıxış edən şirkətin İdarə Heyətinin sədri Rəşad İbrahimov bildirib ki, şirkətin davamlı inkişafında insan kapitalı əsas amillərdən biridir: “Yenilənmiş ‘Araz Akademiyası’ yalnız təlimlərin keçirildiyi məkan deyil, gələcəyin liderlərinin yetişdiyi, bilik və təcrübənin paylaşıldığı strateji inkişaf platformasıdır. Müasir texnologiyalarla təchiz edilmiş iki qiymətləndirmə mərkəzi əməkdaşlarımızın potensialının üzə çıxarılmasına, onların karyera inkişafının obyektiv göstəricilər əsasında idarə olunmasına imkan yaradacaq”
“Araz Akademiyası”nda mağazadaxili əməliyyatlar, müştəri xidmətləri, logistika, keyfiyyətə nəzarət, rəqəmsal bacarıqlar, idarəetmə və liderlik istiqamətləri üzrə müxtəlif təlim modullarının həyata keçirilməsi planlaşdırılır.
