Veysəloğlu Şirkətlər Qrupuna daxil olan “Araz” supermarketlər şəbəkəsi beynəlxalq təcrübəni şirkət daxilində paylaşaraq bilik mübadiləsini gücləndirmək və əməkdaşların peşəkar inkişafını dəstəkləmək məqsədilə həyata keçirdiyi “Bilik paylaşıldıqca dəyərlidir” layihəsini davam etdirir. Layihə çərçivəsində “Araz” supermarketlər şəbəkəsinin İstanbulda keçirilən Qablaşdırma Sənayesi Sərgisində, eləcə də Daşkənd və Səmərqənd şəhərlərinə təşkil olunmuş işgüzar səfərlərdə iştirak edən nümayəndə heyəti ilə görüş təşkil edilib. Görüş zamanı səfərlər çərçivəsində əldə edilən biliklər, yeni tendensiyalar və texnoloji həllərlə bağlı fikir mübadiləsi aparılıb, qazanılan təcrübə əməkdaşlarla bölüşülüb.
Təqdimat zamanı qablaşdırma sahəsində qlobal və regional trendlər, onların bazara təsiri, müasir avtomatlaşdırılmış qablaşdırma texnologiyaları və innovativ həllər müzakirə olunub. Eyni zamanda, qablaşdırmanın satış göstəricilərinə və istehlakçı qərarlarına təsiri, regional bazarlarda satış dinamikası və istehlakçı davranışlarının müqayisəli təhlili iştirakçılara təqdim edilib.
Görüşdə Özbəkistan bazarı üzrə yerli məhsul çeşidi, qiymət siyasəti və qablaşdırma standartlarına dair praktiki müşahidələr iştirakçılarla bölüşülüb, əldə olunan təcrübələrin yerli bazarda tətbiqi imkanları üzrə yanaşmalar və tövsiyələr müzakirə olunub.
