"Araz" supermarketlər şəbəkəsinin əməkdaşlarının mütaliəyə marağını təşviq etmək, kitablar ətrafında fikir mübadiləsi aparmaq və yeni oxu ənənəsi formalaşdırmaq məqsədilə yaradılan "Kitabsevərlər" Klubunun ilk görüşü baş tutub.
Səmimi atmosferdə keçən görüşdə klub üzvləri bir-biri ilə yaxından tanış olub, kitab oxuma vərdişləri, sevdikləri müəlliflər və janrlar haqqında söhbət aparıblar. Görüş iştirakçıları kitabların şəxsi inkişaf, dünyagörüşünün genişlənməsi və fərqli baxış bucaqlarının formalaşmasındakı rolunu da müzakirə ediblər.
Görüş zamanı klubun fəaliyyət istiqamətləri müəyyənləşdirilib, növbəti görüşədək birlikdə oxunacaq kitab seçilib və gələcək planlarla bağlı fikir mübadiləsi aparılıb.
Görüşün sonunda iştirakçılara xatirə olaraq üzərində adları yazılmış əlfəcinlər təqdim edilib. Bu kiçik hədiyyə kitabsevərlərin mütaliə yolçuluğuna xoş bir xatirə və motivasiya kimi düşünülüb.
"Kitabsevərlər" Klubunun əsas məqsədi əməkdaşlar arasında mütaliə mədəniyyətini təşviq etmək, fikir mübadiləsi üçün səmimi platforma yaratmaq və kitabsevərləri bir araya gətirməkdir.
Klubun növbəti görüşü seçilmiş kitabın müzakirəsinə həsr olunacaq.
