Veysəloğlu Şirkətlər Qrupuna (VŞQ) daxil olan “Araz” supermarketlər şəbəkəsinin “Tələbə təqaüdü” proqramından yararlanan tələbələrlə görüş keçirilib. Görüşdə yüksək nəticə göstərərək ölkənin nüfuzlu ali təhsil müəssisələrinə qəbul olmuş tələbələr iştirak edib.
Tədbirdə “Araz” supermarketlər şəbəkəsinin İdarə Heyətinin sədri Rəşad İbrahimov, İdarə Heyətinin üzvləri və şirkətin digər rəhbər şəxsləri iştirak ediblər.
Görüş zamanı Rəşad İbrahimov tələbələrlə onların təhsil istiqamətləri, gələcək karyera planları və hədəfləri barədə fikir mübadiləsi aparıb, öz təcrübə və tövsiyələrini bölüşüb. Gənclərin təhsilinə dəstəyin gələcəyin peşəkar kadrlarının formalaşmasına mühüm töhfə olduğunu vurğulayan Rəşad İbrahimov tələbələri əldə etdikləri nəticələr münasibətilə təbrik edib və onlara gələcək fəaliyyətlərində uğurlar arzulayıb.
Qeyd edək ki, “Araz” supermarketlər şəbəkəsi əməkdaşlarının ölkə daxilində və xaricdə ali təhsil müəssisələrinin bakalavr pilləsində təhsil alan övladlarına qəbul imtahanında topladıqları nəticələrə uyğun olaraq birdəfəlik mükafat və ya aylıq təqaüd təqdim edir.
Hazırda isə 100 tələbəyə şirkət tərəfindən aylıq təqaüd ödənilir. “Tələbə təqaüdü” proqramı “Araz” supermarketlər şəbəkəsinin bütün struktur bölmələrində çalışan əməkdaşlara şamil edilir.
“Tələbə təqaüdü” proqramı 2010-cu ildə təsis edilib. Proqram çərçivəsində indiyədək 1 000-ə yaxın tələbəyə dəstək göstərilib. Onlardan 350 nəfərə təhsil aldıqları müddət ərzində aylıq əsasda mütəmadi təqaüd ödənilib, 650 nəfərə isə “Tələbə təqaüdü” proqramı çərçivəsində birdəfəlik mükafat təqdim olunub.
Şirkət əməkdaşları da tələbə adını qazandıqda və ya təhsillərini davam etdirdikdə proqram çərçivəsində müvafiq dəstəkdən yararlana bilirlər.
“Tələbə təqaüdü” proqramında iştirak üçün müəyyən meyarlar nəzərdə tutulsa da, şəhid ailələrinin üzvləri və müharibə veteranlarının övladları üçün xüsusi yanaşma tətbiq edilir. Belə ki, onların övladları tələbə adını qazandıqları halda heç bir əlavə meyara tabe tutulmadan təhsil aldıqları müddət ərzində aylıq təqaüdlə təmin olunurlar.
Proqramın əsas məqsədi əməkdaşların sosial rifahına dəstək olmaq, yüksək nəticə göstərən gənclərin təhsilinə töhfə vermək və gələcəyin ixtisaslı kadr potensialının inkişafını təşviq etməkdir.
