“Araz” supermarketlər şəbəkəsinin nəzdində təsis edilmiş “Araz Akademiyası”nın ilk tədris proqramı olan “Mağaza idarəçiliyi” məzunları təhsilini tamamlayıb.
“Mağaza idarəçiliyi” proqramının əsas məqsədi karyera yüksəlişinə nail olmağı hədəfləyən əməkdaşların peşəkar inkişafını təmin etmək, həmçinin mağaza idarəetmə heyətinin ehtiyat kadr bazasını yaratmaqdır. Belə ki, burada seçilmiş mağaza əməkdaşları baş satıcı, baş kassir, administrator və mağaza müdiri vəzifələri üzrə tam hazırlıq proqramı keçirlər. Proqrama qatılmaq üçün namizədlər isə hazırda satıcı, kassir, admistrator, mal qəbulçusu və digər vəzifələr üzrə çalışan əməkdaşlar arasından seçilir. Ümumilikdə Akademiyanın ölkədə satış sahəsində peşəkar kadrların yetişdirilməsinə və insan kapitalının güclənməsinə xidmət etməsi nəzərdə tutulur. Akademiyanın əsas özəlliklərindən biri burada 2-ci nəsil təlimçilərin fəaliyyət göstərməsidir. Akademiyanın təlimçi heyəti şirkətdə karyerasını qurmuş, biznesi daxildən bilən, bütün özəlliklərinə bələd olan, beynəlxalq standartlara uyğun yeni nəsil kadrların hazırlanması üçün bilik, bacarıqlarını tətbiq edən peşəkar əməkdaşlar və rəhbərlərdir.
“Mağaza idarəçilik” proqramının “mağaza müdiri” istiqaməti üzrə ilk qruplarının tədrisinə bu ilin aprel ayında başlanılıb. Nəzəri və praktiki hissələrdən ibarət olan təlim proqramını 28 əməkdaş uğurla tamamlayıb.
“Mağaza idarəçilik” proqramının ilk məzunlarının diplomlarını Veysəloğlu Şirkətlər Qrupunun (VŞQ) təsisçisi Aydın Talıbov təqdim edib.
Tədbirdə çıxış edən “Araz” supermarketlər şəbəkəsinin İdarə Heyətinin sədri Rəşad İbrahimov, İnsan resursları və biznesə dəstək direktoru Pərviz Qasımov, İnsan resursları departamentinin müdiri Anar Sənani Akademiyanın uğurlu fəaliyyəti, gələcək hədəfləri, pərakəndə sektorunda kadr hazırlığı üzrə əldə ediləcək nəaliyyətlərdən bəhs ediblər.
Xatırladaq ki, “Araz Akademiyası” 2025-cü ildə “Araz” supermarketlər şəbəkəsinin nəzdində yaradılıb.
