Partnyor ol
14.02.2022 / 00:00

Ürəyə gedən yol yeməkdən keçir

Artıq uzun müddətdir ki, ölkəmizdə də 14 Fevral – Sevgililər Günü kimi qeyd edilir. Bir-birlərinə sevgi ilə bağlı olan cütlüklər böyük və ya kiçik sürprizlər edirlər. Əgər hələ də bir ideyanız yoxdursa, bu bloqa yaxın əyləşin, sizə kiçik məsləhətimiz var. 
Bəlkə həmin günü sevgiliniz üçün gözəl bir süfrə açaraq dəyərləndirəsiniz? Öz əllərinizlə ikiniz üçün yemək bişirmək fikri heç pis səslənmir. Əgər ideyanı bəyəndinizsə, bloqun davamında sizin üçün kiçik bir menyu yaratmışıq.

1. “Hellim İzqara Salatı”
Həm olduqca yüngül, həm doyumlu, həm də hazırlanması olduqca rahatdır. Pendir sevirsinizsə, bu salatı çox bəyənəcəyinizdən əminik.
Tərkibi: 
- 1 dəst aruqula (roka)
- 1 ədəd kahı
- ¼ qırmızı kələm
- 1/3 stəkan zeytun yağı
-  ¼ nar şirəsi
- 1 ç.q. duz
- 1 ç.q. qara istiot
- ¼ limon suyu
- 100 qr. hellim pendiri
- Zövqünüzə uyğun göyərti
Hazırlanması:
Yaşıllıqları və qırmızı kələmi yaxşıca yuyun və xırda-xırda doğrayıb bir qaba qoyun. Bu vaxt hellim pendirini ən azı 1 sm. qalınlığında doğrayın və heç bir yağ əlavə etmədən tavada qızardın. İlk dəfə qoyduğunuzda suyunu salacaq, bir müddət sonra suyunu çəkəndə o biri üzünə çevirib qızartmağa davam edin. Təxminən 2-3 dəqiqədən sonra qızılı rəngə çalanda qazın üzərindən götürün. Yaşıllıqların və qırmızı kələmin üzərinə duz, qara istiot, nar şirəsi, limon suyu və zeytun yağı əlavə edib yaxşıca qarışdırın. Qarışımı servis edəcəyiniz qaba əlavə edib üzərinə qızartdığınız hellim pendirlərini düzün. Ləzzətli “Hellim İzqara” salatınız hazırdır. 
Qeyd edək ki, bu salatın başqa inqrediyentlərlə hazırlanan növləri də mövcuddur. 
2. “Fettuccine Alfredo”
Göbələk və qaymaq birləşməsini “fettuccine” makaronunda siz də çox sevəcəksiniz, yeməyi hazırlamaq bir az vaxt alsa da, prosesdən zövq alacaqsınız.
Tərkibi:
- 1 paket “fettuccine” və ya “taglitelli” makaron
- 1 qutu qaymaq (200 ml)
- Yarım toyuq filesi
- Yarım paket göbələk
- 6 x.q. bitki yağı
- 2 ç.q. qurudulmuş nanə
- Yarım ç.q. qara istiot
- 1 ç.q. kəklikotu
- Parmesan pendiri
- 1 ç.q. duz
Hazırlanması:
İlk növbədə makaronu suda 15 dəqiqə qaynadıb qırağa qoyun. Bir tavaya yağ töküb göbələyi doğradıqdan sonra əlavə edin və bişməyinə yaxın kiçik ölçüdə doğradığınız toyuq filesini əlavə edin. Hazır olmağına yaxın üzərlərinə qaymağı əlavə edin və 3 dəqiqə daha bişirin, sonra qazı söndürün. Üzərinə parmesan pendiri, quru nanə, kəklikotu, duz, istiot əlavə edin və bir az gözlədin. Sonda isə makaronu bir qaba əlavə edib hazırladığınız qarışım ilə birlikdə qarışdırıb nuş edə bilərsiniz. 
3. Oreolu Maqnoliya
Belə xoş günün sonunu şipşirin bitirmək üçün desert olmasa, olmaz. Oreolu maqnolia həm olduqca yüngüldür, həm də dadlıdır. Onun hazırlamaq da çox rahatdır. 
Tərkibi:
- 1 qutu krem (200 ml)
- 1 litr süd
- 1 stəkan şəkər tozu
- 1 yumurta sarısı
- 2 x.q. qarğıdalı nişastası
- 2 x.q. un
- 1 paket vanil tozu
- 2 paket oreo

Hazırlanması:
Maqnoliya üçün ilk növbədə kremini hazırlayaq. Orta boy qazana bir litr süd, bir yumurta sarısı, bir stəkan şəkər tozu, iki xörək qaşığı ələkdən keçirilmiş un və iki xörək qaşığı qarğıdalı nişastası əlavə edin. Bu qarışımı bişirməzdən əvvəl yaxşıca qarışdırın. Lazımi qatılığı əldə etdikdən sonra qazın üzərinə qoyun və qaynayana qədər qarışdıraraq bişirin. Hazır olan kremin içinə bir paket toz vanil tökün, mikser ilə qarışdırın və ən azı yarım saat gözlədin.
Daha sonra hazırladığınız qarışımın içinə bir paket krem əlavə edin. Hər şeyi ən azı 2 dəqiqə yenidən mikser ilə qarışdırın. Krem istirahət edərkən oreonu hazırlayın; təxminən iki paket oreonu blender ilə yaxşıca əzin və bir qaba qoyun. Bir stəkan götürün, ilk öncə ən alta krem əlavə edin, üzərinə isə oreo qırıntılarını tökün və stəkan dolana qədər bu prosesə davam edin. Çox dadlı şirniyyatınız hazırdır, nuş olsun! 

Ümid edirik ki, bu bloq 14 fevrala özəl sizin üçün faydalı olar. Bunlar kiçik süprizlərdir, əsas olan bir-birinizə olan qarşılıqlı sevgi və hörmətdir. Hər zaman sevgi ilə qalın. 
 

Bölüşmək