Partnyor ol
11.02.2022 / 00:00

Südlü, yoxsa südsüz qəhvə?

Daha çox çayı sevən xalq olsaq da, son dövrlər ölkəmizdə qəhvəsevərlər də yetəri qədərdir. Şəhərin hər yerində olan rəngarəng kafelərin hər biri növbənöv qəhvələr sifariş edən insanlarla doludur. Sırf bunu nəzərə alaraq evdə hazırlamağınız üçün məşhur qəhvələrin hazırlanma üsullarını sizinlə bölüşürük. Əlbəttə ki, professional qəhvə aparatları ilə edilənlərin ləzzəti tamamilə fərqli olacaqdır, amma qeyd etdiyimiz üsullar ilə də evdə hazırladığınız qəhvənin dadını çox bəyənəcəksiniz. 

Espresso
Demək olar ki, bütün məşhur qəhvələr espresso üzərində qurulub. Espressonun üzərinə su və ya süd əlavə edərək digər məşhur qəhvə növlərini hazırlmaq olur. Əslində, qəhvə maşını olmadan espressonu hazır etmək çətindir, amma mümkünsüz deyil. Evdə espreso hazırlamağın ən yaxşı yolu moka qazanıdır və mərhələli şəkildə sizin üçün prosesi yazırıq:
1. Moka qazanının alt hissəsinə qaynadılmış su əlavə edin.
2. Orta hissəyə espresso üçün üyüdülmüş qəhvə qoyun.
3. Moka qazanında istiliyi orta səviyyəyə gətirin və yavaş-yavaş qaynamasına icazə verin.
4. Qaynadıqdan sonra aşağı hissədəki su qəhvənin aromasını özünə çəkəcək və yuxarı hissədə toplanacaq.
5. Köpürən səsi eşitdiyiniz zaman qəhvəni moka qazanından stəkanınıza süzüb nuş edə bilərsiniz. 
“Cafe latte”
Bizdə “Latte” olaraq məşhurlaşsa da , italiyan dilində adı “Cafe Latte”, yaxud “Cafe Latte Machiato” olaraq gedir. Ümumiyyətlə, bu qəhvə uzun və incə stəkanlarda servis edilir, istəyə əsasən üzərinə qaymaq əlavə edilir. Evdə hazırlamaq əlbəttə ki, mümkündür. Bunun üçün sizə qəhvə, süd və mikser lazımdır. 8 qram qəhvəni su ilə birlikdə “espresso” hissəsində qeyd etdiyimiz kimi moka qazanında hazırlayın. Südü isidin və mikser ilə yaxşıca qarışdırın. Sonra isə qəhvənin üzərinə asta-asta əlavə edin. Dadlı “latte”niz hazırdır. 
“Cappuccino”
Daha bir İtaliya qəhvəsi olan “Cappuccino”nu bəzən “Latte” ilə fərqləndirməkdə çətinlik çəkirlər. Onların arasındakı əsas fərq südün miqdarındadır. “Cappuccino” ilə müqayisədə “Latte”nin tərkibində süd daha çox, köpük isə daha az olur. Ümumiyyətlə baxdıqda isə, ikisinin də hazırlanma qaydası eynidir. 

“Mocha” 
Bu qəhvə “Latte”nin şokolad aromalı növüdür. Evdə hazırladığınız espressoya 24 qram şokolad tozu əlavə edin və qəhvədə həll olana qədər qarışdırın. Bu qarışıma mikser ilə köpüklənərək qızdırılan 30 ml. isidilmiş süd əlavə edin. Təqdimat üçün üstünə şokolad, darçın tozu və krem əlavə etdikdən sonra nuş edə bilərsiniz. Qeyd edək ki, süd ilə olan qəhvələr üçün market və supermarketlərdən inək südü əldə etməyiniz kifayət edir. Hazırda 16 fevral 2022-ci il tarixinə qədər “Araz” Supermarketlərdə “süd məhsulları” festivalı çərçivəsində süd məhsullarına endirim var, bu fürsəti bolluca qəhvə hazırlamaq üçün istifadə edə bilərsiniz. 
Türk qəhvəsi 
Bizim də çox sevərək içdiyimiz qardaş ölkənin qəhvəsi bir çox məclislərdə qonaqlara təqdim edilir. Bəs bu qəhvə necə türk qəhvəsi adına sahib olub? Belə ki, Ərəb yarımadasında qəhvə meyvəsi kəşf edildikdən sonra hazırlanan içki, türklər tərəfindən tamam fərqli üsul ilə, yəni özlərinə xas tərzdə təqdim edildi. Evdə hazırlama üsulu da olduqca rahatdır. İlk növbədə qəhvənin bütün növlərdə olduğu kimi təzə qovrulmuş və keyfiyyətli olması vacibdir. Bu gün türk qəhvəsi elektrik qəhvə qabları (cezve) və maşınlarla hazırlana bilsə də, bir çoxumuzun ənənəvi qəhvədən imtina etmədiyi də məlumdur.
Bunun üçün qəhvə qabına sırasıyla qəhvə, istəyə görə şəkər və su əlavə edilir. Bir fincan üçün 2 çay qaşığı qəhvə və bir fincan ölçüsündə soyuq su yetərlidir. İkisi birlikdə qəhvə qabında həll olunması üçün qarışdırılır və aşağı istilikdə sonradan əl vurulmadan bişirilir. Qaynamazdan əvvəl köpük əmələ gələndə qalxan köpük stəkanlara tökülür, qəhvə qabında yenidən bişirilir və yavaş-yavaş fincana süzülür.

Qəhvə sevgisi bir eşqdir, dadını sevən bir daha ondan əl çəkə bilmir. Amma bir çox qidada olduğu kimi, qəhvəni də miqdarında içmək lazımdır ki, sağlamlığa ziyan gəlməsin. Çünki hər şeydən öncə sağlamlıq gəlir! 

Bölüşmək