“Araz” supermarketlər şəbəkəsi ilboyu Təbiəti qorumaq mənim əlimdədir” şüarı altında çoxsaylı ekoloji tədbir və layihələr həyata keçirir. Şirkət mütəmadi olaraq təbiətin qorunması və ətraf mühitin mühafizəsi istiqamətində ağacəkmə və təmizlik aksiyaları, ekoçantalardan istifadənin təşviqi layihələri, batareyaların, plastik və şüşə butulkaların toplanılıb təhvil verilməsi tədbirləri ilə bu sahəyə öz töhfəsini verir.
Ekoçantam “Araz”dan
“Araz” supermarketlər şəbəkəsi müştəriləri alış-veriş zamanı polietilen torbalar əvəzinə ekoçantalardan istifadə etməyə çağırır. Bununla da onları təbiəti qorumağa təşviq edir. “Araz” marketlərdə ekoloji cəhətdən təmiz, eyni zamanda uzunömürlü ekoçanta və bitki tərkibli biopaketlər müştərilərə təqdim olunur. Biopaketlər parçadan hazırlanır və çoxtəyinatlı olmaqla yanaşı, qısa müddətdə çürüyərək torpağa qarışır. Ekoçantalar isə plastikdən deyil, bitki liflərindən hazırlanır və 3-4 ay ərzində çürüyərək torpağa qarışır. Bu paketlər təbiət dostudur və ətraf mühit üçün təhlükə yaratmır.
Tullantıları ekoçantaya dəyiş
Polietilen torbalardan və plastik butulkalardan istifadənin azaldılması istiqamətində aparılan maarifləndirici layihələr çərçivəsində Ekologiya və Təbii Sərvətlər Nazirliyi ilə birgə mütəmadi olaraq “Tullantıları ekoçantaya dəyiş” aksiyası həyata keçirilir. Aksiya çərçivəsində plastik butulka, şüşə butulka və ya banka, işlənmiş batareya təhvil verən vətəndaşlara ödənişsiz olaraq ekoçantalar hədiyyə edilir. Layihənin məqsədi təbiətə böyük ziyan verən polietilen torbalar və plastiklərdən istifadənin tədricən azaldılmasına nail olmaq, insanlarda ekoçantalardan istifadəyə maraq yaratmaqdır.
Tullantıları tingə dəyiş
“Araz” supermarketlər şəbəkəsi və Ekologiya və Təbii Sərvətlər Nazirliyinin mütəmadi olaraq birgə həyata keçirdikləri layihələrdən biri də “Tullantıları tingə dəyiş” aksiyasıdır. “Araz” mağazalarının qarşısında təşkil olunan aksiyanın keçirilməsində məqsəd təbiətə qayğı göstərmək arzusunda olan, lakin müəyyən səbəblərdən bunu bacarmayan şəxsləri ağac tingləri ilə təmin etmək, eyni zamanda tullantıların təkrar emalına dəstək olmaqdır. Aksiya zamanı plastik butulka, şüşə butulka və ya banka, işlənmiş batareya gətirən vətəndaşlara ting verildi. Sözügedən layihə il ərzində əkin mövsümü dövründə həyata keçirilir.
Batareyaları təhvil ver, təbiəti qoru!
Ekologiya və Təbii Sərvətlər Nazirliyi ilə birgə həyata keçirilən “Batareyaları təhvil ver, təbiəti qoru!” layihəsinin məqsədi ekoloji mühiti mühafizə etməkdir. Layihə çərçivəsində vətəndaşlar istifadəyə yararsız batareyaları “Araz” və “Spar” marketlərinin Bakı və Sumqayıt filiallarında yerləşdirilən batareya qutularına atmaqla onların utilizasiyasına dəstək olurlar. Mağazalardan toplanan batareyalar “Tullantıları idarəetmə mərkəzi” MMC-yə təhvil verilir. Hazırda şirkətin baş ofisində və 29 filialda bu cür qutular yerləşdirilib.
“Araz”ın təbiətsevərləri ağacəkmə aksiyasında
“Araz” supermarketlər şəbəkəsi Ekologiya və Təbii Sərvətlər Nazirliyi ilə birgə mütəmadi olaraq ağacəkmə aksiyası həyata keçirir. Tədbirdə nazirliyin və “Araz”ın əməkdaşları, həmçinin ekokönüllülər iştirak edirlər. Aksiya çərçivəsində Müşfiqabad qəsəbəsində salınmış meşə ərazisində Abşeron yarımadasının torpaq-iqlim şəraitinə uyğun olaraq Eldar şamı və zeytun ağacları əkilib.
Təbiətə bir parça töhfə
2024-cü ildə “Yaşıl dünya naminə həmrəylik ili”, həmçinin “COP29”un ölkəmizdə keçirilməsi çərçivəsində “Təbiətə bir parça töhfə” adlı layihəni həyata keçirilib. Layihə çərçivəsində “Araz”ın istənilən mağazasından “Araz” ekoçantası alan hər bir müştərinin adına, elə müştərilərlə birlikdə Müşfiqabad qəsəbəsində xüsusi ayrılmış ərazidə bir ağac əkilib. Məqsəd vətəndaşların diqqətini təbiətin qorunmasına, yaşıllıqların artırılmasına yönəltmək, plastiklərin istifadəsini azaltmağa təşviq etməklə təbiətə töhfə vermək olub.
“Araz” Ümumrespublika Təmizlik Marafonunda
“Araz” supermarketlər şəbəkəsi Ekologiya və Təbii Sərvətlər Nazirliyi ilə birlikdə mütəmadi olaraq “Təmiz ölkəm” devizi altında təmizlik aksiyaları həyata keçirir. Onlardan biri də Ümumrespublika Təmizlik Marafonu olub. Bu aksiya çərçivəsində əməkdaşların iştirakı ilə Xəzər dənizinin Novxanı sahili tullantılardan təmizlənib, 1 tondan artıq tullantı yığılaraq daşınıb. Bu növ təmizlik aksiyalarının keçirilməsində əsas məqsəd insanları ətraf mühitə qarşı daha həssas və məsuliyyətli davranmağa təşviq etmək, tullantıların azaldılması və düzgün idarə olunmasına nail olmaqdır.
“Araz”ın sahilində” təmizlik aksiyası
“Araz” supermarketlər şəbəkəsi ekologiyanın qorunması və ətraf mühitin mühafizəsi məqsədilə “Araz”ın sahilində” təmizlik aksiyalarına start verib. Layihə çərçivəsində “Araz” supermarketlər şəbəkəsinin təşəbbüsü, Azərbaycan Respublikası Ekologiya və Təbii Sərvətlər Nazirliyinin 3 saylı Regional Ekologiya və Təbii Sərvətlər İdarəsi və İmişli rayon İcra Hakimiyyətinin dəstəyi ilə İmişli rayonunda Araz çayı sahillərində ilk təmizlik aksiyası təşkil edilib. “Araz” supermarketlər şəbəkəsinin əməkdaşları Araz çayının İmişli rayonu ərazisindən keçən hissəsini tullantılardan təmizləyiblər. Araz çayı sahilindən 220 kq tullantı toplanaraq xüsusi nəqliyyat vasitələri ilə İmişli tullantı poliqonuna daşınıb. Layihənin davamlı təşkili və müxtəlif rayonlarda Araz çayının tullantılardan təmizlənməsi nəzərdə tutulur.
