“Tullantıları hədiyyələrə dəyiş” festivalında vətəndaşlara “Araz” ekoçantaları hədiyyə edilib

Ekologiya və Təbii Sərvətlər Nazirliyinin təşkilatçılığı, Xətai Rayon icra Hakimiyyəti və “Araz” supermarketlər şəbəkəsinin şəbəkəsinin dəstəyi ilə Xətai rayonu Gənclik parkında növbəti “Tullantıları hədiyyələrə dəyiş” festivalı keçirilib. Festivalın məqsədi tullantıların düzgün idarə olunması sahəsində əhalinin maarifləndirilməsi, çeşidləmə vərdişlərinin stimullaşdırılması, resurslardan daha səmərəli istifadə edilməsidir.

Aparılan mütəmadi təbliğat və təşviqat işləri nəticəsində artıq ənənə halını almış bu aksiya zamanı vətəndaşlar tərəfindən ümumi tutumu 770 litr olan şüşə, 2500 litr olan plastik tullantı, 1119 ədəd işlənmiş batareya təhvil alınıb, əvəzində onlara “Araz” ekoçantaları və müxtəlif hədiyyələr verilib.

İl ərzində dəfələrlə təşkil olunan və “Yaşıl dünya naminə həmrəylik ili” çərçivəsində keçirilən yekun aksiya kimi dəyərləndirilən tullantıları təhvil verib əvəzində hədiyyələr almaq kimi təsirli təşviqat formatı həm ictimaiyyətdə tullantıların təkrar emala yönəldilməsinə böyük maraq yaradır, cəmiyyət üzvlərinin bu sahədə daha da maarifləndirilməsinə şərait formalaşdırır, həm də insanlara tullantıların dəyərli resurs olduğunu, yenidən istifadənin və təkrar emalın vacibliyini aşılayır.