“Araz” supermarketlər şəbəkəsi innovativ həllərdən istifadəni genişləndirir

Azərbaycanın pərakəndə ticarət bazarının liderlərindən biri olan “Araz” supermarketlər şəbəkəsi biznes proseslərinin həllərini ehtiva edən SAP S/4HANA sisteminə uğurla keçid edib. Bu sistem qlobal bazarda geniş istifadə edilən, unikal və qabaqcıl platformalardan biridir.

Bu barədə şirkətin İdarə Heyətinin sədri Rəşad İbrahimov Azertag.az-a müsahibəsində deyib. Onun sözlərinə görə, SAP yalnız rəqəmsallaşma deyil, həm də dayanıqlı inkişaf, şəffaflıq, əməkdaşlar və müştərilər üçün dəyər yaratmaq deməkdir: “Son illər müasir dünyada bizneslər qarşısında qoyulan əsas hədəflərdən biri də rəqəmsallaşmadır. Biz də “Araz” olaraq müəssisə resurslarının planlaşdırılması üzrə dünya lideri və uğurlu pərakəndəçilərin seçimi olan SAP S/4HANA sisteminə keçid etmişik. Belə unikal sistemə keçməklə  şirkətimizin bütün əməliyyat sistemlərinin etibarlı şəkildə fəaliyyətinə, eləcə də proseslərin tez və səmərəli genişləndirilməsinə nail olmaq niyyətindəyik. Bu həm də bizə müştərilərimizə daha yaxşı xidmət göstərməyimiz üçün müxtəlif alətlər təqdim edir”.

R.İbrahimov bildirib ki, bu rəqəmsal sistem şirkətin logistika, daşınmaz əmlakın idarə edilməsi, satış və satınalma daxil olmaqla, bütün struktur bölmələrini əhatə edir: “Platforma real vaxtda böyük həcmdə məlumatlarla işləməyə və biznes modellərini asanlıqla yenidən təşkil etməyə imkan verir. Məqsəd şirkətin rəqabətə davamlılığını artırmaq, biznes proseslərinin effektivliyinə nail olmaqdır”.

 Qeyd edək ki, SAP S/4HANA sistemi Veysəloğlu Şirkətlər Qrupuna (VŞQ) daxil olan “Araz” supermarketlər şəbəkəsinin 30 modul, 9000-dən artıq istifadəçi və yüzlərlə mağazasını əhatə edir.