Üzünüzə qulluq edin

Mövsüm fərqi olmadan özümüzə və üzümüzə qulluq etmək mütləqdir. Yayda günəş şüalarının faydaları olsa da, düzgün saatlarda günəşlənməsək zərərli tərəfləri ilə qarşılaşarıq. Elə bu zərərlərdən biri dərimizdə yaranan günəş ləkələridir. Ancaq üzümüzə düzgün qulluq etsək dərini həmin zərərlərdən qoruyarıq.

Odur ki sizinlə evdə hazırlaya biləcəyiniz təbii maska reseptləri paylaşırıq. Maskalar üçün evdə olan inqrediyentlər istifada edə və ya supermarketdən çatışmayanları əldə edib elə indi hazırlaya bilərsiniz.

1. Günəşdən yaranan ləkələrdən bəhs etmişkən üz dərisini tonlaşdıran, parlaqlıq verən və ləkələri solduran yulaf maskası ilə başlayaq.

Maska üçün lazım olacaq:

• 2-3 x. q. yulaf
• 1 ç. q. soda
• Su
• 1 ç. q. bal (quru dərilər üçün)

Hazırlanması:

Yulafı blenderdən keçirin və soda ilə birlikdə bir qaba əlavə edin. Qarışdıra-qarışdıra üzərinə su tökün ki, lazımi qatılıqda olsun. Quru dəriniz varsa, üzərinə 1 çay qaşığı bal əlavə edin. Maskanı üzünüzə tətbiq edib 30 dəqiqədən sonra ilıq su ilə yuya bilərsiniz.

2. Yayda isti havalara görə dəri daha da quruyur və əlbəttə ki, bu hal quru dərisi olanların ən böyük problemlərindən biridir. Dəridəki quruluğu aradan qaldırmaq üçün qatıq-xiyar maskasını yoxlaya bilərsiniz.

Bunun üçün sizə lazım olacaq:

• ½ xiyar
• 1 x. q. ev qatığı
• 1 x. q. yulaf
• 1 ç. q. bal

Hazırlanması:

Xiyarı sürtgəcdən keçirin və digər bütün inqrediyentlər ilə birlikdə qatı hala gələnə qədər qarışdırın. Qarışımı üzünüzdə günəş şüaları ilə daha çox təmasda olan hissələrə tətbiq edin. 30 dəqiqə sonra maskanı ilıq su ilə yuyun və dərinizin canlı görünüşündən zövq alın.

3. Şaftalı dəri üçün möcüzələr yaradır; dərini təmizləyir, tonlaşdırır, məsamələri yox edir, qırışların qarşısını alır, sızanaq və qara nöqtələrin sayını azaldır. Qeyd edəcəyimiz maskanı dərinizə tətbiq etdiyiniz anda fərqi hiss edəcəksiniz. Ölü dərilərdən xilas olacaqsınız, təravətli və parlaq görüntü əldə edəcəksiniz.

İnqrediyentlər:

• 1 ədəd şaftalı
• 1 ədəd yumurta
• 1 x. q. qatıq

Hazırlanması:

Əvvəlcə 1 yumurtanın ağını ayırıb qaba qoyun. Dəriniz yağlıdırsa, yağsız qatıq, qurudursa, yağlı qatıq istifadə edin. Yumurta olan qaba qatıq əlavə edib yaxşıca qarışdırın. Şaftalını soyduqdan sonra iki hissəyə bölün. Böldükdən sonra qaşıqla əzin və digər qarışıma əlavə edib yaxşıca qarışdırın. Qarışdırdıqdan sonra masaj hərəkətləri ilə dərinizə tətbiq edin və 25 dəqiqə gözləyin. İlıq su ilə yaxşı-yaxşı yuduqdan sonra güzgüdə gördüyünüz görüntünü çox bəyənəcəksiniz.

Qeyd edək ki, maskaların tərkibində olan inqrediyentlərin hər hansısa birinə qarşı allergiyanız varsa, həmin maskadan istifadə etməməyi tövsiyə edirik. Ümid edirik ki, sizin üçün faydalı bir bloq oldu. Növbəti bloqlarda görüşənədək!