KOBİA nümayəndə heyəti “Araz” Logistika Mərkəzini ziyarət edib

KOBİA nümayəndə heyəti “Araz” Logistika Mərkəzini ziyarət edib

Kiçik və Orta Biznesin İnkişafı Agentliyinin (KOBİA) İdarə Heyətinin sədri Orxan Məmmədov və Agentliyin əməkdaşları Veysəloğlu Şirkətlər Qrupuna (VŞQ) məxsus “Araz” Logistika Mərkəzində olublar. Qonaqlar VŞQ-nin təsisçisi və İdarə Heyətinin sədri Aydın Talıbov və Qrupa aid olan biznes subyektlərinin rəhbərləri ilə birlikdə Logistika Mərkəzinin iş prinsipi ilə yaxından tanış olublar. İnfotur çərçivəsində KOBİA üzvlərinə pərakəndə sektoru əhatə edən tədarük zəncirinin necə həyata keçirilməsi ilə bağlı məlumat verilib, bəzi əməliyyatların icrası nümayiş edilib.

KOBİA nümayəndələri  Logistika Mərkəzinin yerləşdiyi ərazidə fəaliyyət göstərən Veysəloğlu Şirkətlər Qrupuna məxsus “Xonça” istehsalat fabrikinin iş fəaliyyəti ilə də yaxından tanış olublar.

Qonaqlara məlumat verilib ki, Qafqazın ən böyük logistika mərkəzlərindən biri olan  “Araz” Logistika Mərkəzinin təməli 2017-ci ildə qoyulub. Mərkəz 22 hektar sahəni əhatə edir və bunun 9 hektarında 95 min palet tutumuna malik qapalı anbar yerləşir. Anbar gündəlik 6000 palet mal qəbul edir və 4000 mağazaya məhsul təminatını həyata keçirir.

“Xonça” istehsalat fabriki isə beynəlxalq standartlara uyğun qurulub və müştərilərə 200-dən çox məhsul çeşidi təqdim edir. Fabriki Qafqazın ən böyük şirniyyat istehsal məntəqələrindən biridir və burada aylıq 1000 tondan çox məhsul istehsal edilir.