Autizmli uşaqlar “Xonça”nın qonağı olublar

2 Aprel - Dünya Autizm Məlumatlandırma Günü münasibətilə autizm sindromlu uşaqlar “Xonça” fabrikində qonaq olublar.

Tədbir “Araz” supermarketlər şəbəkəsi və Əmək və Əhalinin Sosial Müdafiəsi Nazirliyinin tabeliyində olan Dövlət Tibbi-Sosial Ekspertiza və Reabilitasiya Agentliyinin birgə təşkilatçılığı ilə həyata keçirilib.

Dövlət Tibbi-Sosial Ekspertiza və Reabilitasiya Agentliyinin 1 və 2 saylı Uşaq Reabilitasiya Mərkəzində reabilitasiya xidmətlərinə cəlb edilən autizm sindromlu uşaqlar “Xonça”nın fəaliyyəti və istehsal prosesi ilə yaxından tanış olublar. Uşaqlara müəssisənin peşəkar mütəxəssisləri tərəfindən master-klas keçirilib və birlikdə müxtəlif şirniyyatlar bişiriblər.

Autizmli şəxslərin fərqliliklərinə diqqət çəkmək, onların sosial mühitə adaptasiyasına dəstək olmaq məqsədilə keçirilən tədbirdə uşaqlar əyləncəli vaxt keçiriliblər. Sonda onlara “Araz” supermarketlər şəbəkəsi və “Xonça” tərəfindən  hədiyyələr təqdim edilib.