26.01.2022 / 00:00

Dünya ləzzətləri

Ümumiyyətlə, biz xalq olaraq ətli yeməkləri çox sevirik. Bəlkə də bir çoxunuz ailə daxilində, qonşuda və ya yaxın çevrədə “ətli yemək yeməyəndə elə bil doymuram” deyimi ilə qarşılaşmısınız. İnanırıq ki, ət deyəndə ilk ağlınıza toyuq, dana əti və ya quzu əti gəlir. Onsuz da bizim milli mətbəximiz demək olar ki, qeyd etdiyimiz ətlər üzərinə qurulub, amma ətin daha fərqli növləri olduğunu da unutmaq olmaz., Qaz, ördək, bildirçin, hətta dovşan və bir çox fərqli, mətbəximizə xas olmayan ət növləri mövcuddur. Əslində, nə yaxşı ki, əti bu qədər sevirik. Çünki ətin tərkibində bədənimiz üçün faydalı olan zülal, B vitaminləri (niasin, tiamin, riboflavin və B6), E vitamini, dəmir, sink və maqnezium var. Düzdür, hər şey qədərində gözəldir deyimini də mütləq qeyd etməliyik və əti də qədərində qəbul etməliyik.

Bəzən yemək bişirərkən eynilikdən yorulub market və ya supermarketlərə gedəndə fərqli növ ət axtarışına çıxırıq. Əti aldıqdan sonra isə “görəsən nə bişirim?” sualı ilə günümüzün yarısını boş yerə xərcləyirik.

Əgər siz də bu nüansı yaşayırsınızsa, bu bloq tam sizin üçündür. Biz burada dünya mətbəxindən seçilmiş 5 ətli yeməyin reseptindən bəhs edəcəyik. Düşünürük ki, bəlkə də bu yeməklərdən bəzilərini ilk dəfə eşidəcəksiniz. Görək siz daha çox daha çox hansını bəyənəcəksiniz.

  1. “Bakso” – İndoneziya

İnqrediyentlər:

  • dana əti
  • əriştə
  • un
  • zəncəfil
  • ağ soğan
  • yaşıl soğan
  • kərəviz

Bizim mətbəxə aid küftəbozbaşa indoneziyalılar “bakso” deyir. “Bakso” dana ətindən hazırlanmış küftə yeməyidir. İndoneziyada “bakso”nun bir çox növü var, lakin bunların hamısına üç əsas inqrediyent daxildir; bulyon, əriştə və küftə.

Bu, əslində küçə yeməyi olsa da, onu açıq yeməkxanalardan tutmuş zərif restoranlara qədər hər yerdə tapmaq olar, eyni zamanda indoneziyalılar gündəlik olaraq bu yeməyi bişirməyi çox sevirlər. Əsasən əlavə edilən qarnirlər bərk qaynadılmış yumurta və ya tofu (soya südündən hazırlanmış kəsmiklərin bərkidilməsindən hazırlanır) olur.

 

  1. “Rouladen” – Almaniya

İnqrediyentlər:

  • dana əti (steyk)
  • qarğıdalı nişastası
  • xardal
  • qırmızı istiot
  • qaymaq

“Rouladen” müxtəlif inqrediyentlərlə doldurulmuş ənənəvi alman ət ruletləridir. Həmişə qaymaqlı sous ilə servis olunur. Ruletlər adətən uzun və nazik steyklərdən hazırlanır. İlk növbədə steyk döyülür, ədviyyatlanır və ona xüsusi ləzzət verən, ətin şirəli və yumşaq olmasını təmin edən alman xardalı ilə marinad edilir.

“Rouladen”in ənənəvi içliyi adətən turşulardan hazırlanır. Lakin müxtəlif regionlar içlikdə yerkökü, soğan və ya çörək istifadə edirlər. Bu, zövqə görə dəyişir.

 

  1. Portağallı toyuq – Çin və ABŞ

İnqrediyentlər:

  • toyuq
  • yumurta
  • qarğıdalı nişastası
  • portağal
  • şəkər tozu
  • sirkə
  • soya sousu
  • zəncəfil

Əvvəlcə Hunan bölgəsindən Çin yeməyi olan portağallı toyuq  bir müddət sonra amerikalılar tərəfindən mənimsəndi və çoxsaylı Şimali Amerika “fast-food” restoranlarında servis edildi. Bu, şirin və turş portağal, çili sousu ilə qızardılmış və döyülmüş toyuqdan ibarət yeməkdir.

Birləşmiş Ştatlarda “Panda Express” adlı bir zəncir restoranı özünü yeməyin amerikanlaşdırılmış versiyasını yaratmaqda və Hunanın orijinal kəskin və ədviyyatlı versiyasından daha şirin bir yeməyə çevirdiyini qeyd etdi. Hunan bölgəsinə nisbətdə Amerikada hazırlanan portağallı toyuq daha şirin və turşməzə bir dada malikdir.

  1. “Pörkölt” – Macarıstan

İnqrediyentlər:

  • quzu əti
  • soğan
  • sarımsaq
  • qırmızı istiot

“Pörkölt” Macarıstanın milli yeməyidir və adı qovurmaq mənasını verən “pörkölni” sözündən götürülmüşdür. Bu yemək bol soğan, sarımsaq və qırmızı bibər tozu ilə qaynadılmış quzu ətindən hazırlanır.

Ənənəvi olaraq qaynadılmış kartof və ya makaron ilə servis edilir. “Pörkölt”ün tarixi ənənəvi macar gulyaşı ilə sıx bağlıdır, çünki hər iki yemək əvvəllər toz qırmızı bibərdən çox istifadə edən kəndlilər tərəfindən hazırlanırdı.

  1. “Fiskefrikadeller” – Danimarka

İnqrediyentlər:

  • ağ balıq
  • yumurta
  • süd
  • keşniş
  • ağ soğan
  • qaymaq
  • suxarı
  • kərə yağı

Danimarka “fiskefrikadeller”i tavada qızardılmış balıq kotletləridir. Onlar təmizlənmiş ağ balıq filesi, yumurta, süd, soğan, müxtəlif ədviyyatlar və təzə yaşıllıqların qaymaqla qarışığından hazırlanır. Bəzi növlər tez-tez krem, suxarı, qızıl balıq və krevet kimi digər dəniz məhsulları ilə hazırlanır.

Bu, balıqdan hazırlanan yeməyi danimarkalılar əsas yemək kimi qəbul edir. Adətən yağda qaynadılmış kartof, Danimarka remuladı və limon dilimləri ilə servis olunur.

Ümid edirik ki, bu 5 fərqli yeməklə sizə mətbəxdə fərqli ideyalar verə bildik.

Bölüşmək