Litvanın Azərbaycandakı fövqəladə və səlahiyyətli səfiri Kestutis Vaşkeleviçus və müavini Kristina Baubinaite “Araz” supermarketlər şəbəkəsinin baş ofisində qonaq olub.
Qonaqlar şirkətin İdarə Heyətinin sədri Rəşad İbrahimov, Kommersiya direktoru Mustafa Çağlar Kurt və Şəxsi marka və idxal şöbəsinin müdiri Nuranə Ağayeva ilə görüşüblər. Görüş zamanı səfirə Veysəloğlu Şirkətlər Qrupunun və “Araz” supermarketlər şəbəkəsinin fəaliyyət istiqamətləri, pərakəndə satış sahəsində həyata keçirilən layihələr və inkişaf strategiyaları barədə ətraflı məlumat verilib.
Görüş çərçivəsində tərəflər arasında Litva istehsalçıları ilə birbaşa əməkdaşlıqların qurulması, şirkətlərarası əməkdaşlıq və biznes missiyaların təşkili, həmçinin eksklüziv distribusiya imkanlarının genişləndirilməsi məsələləri müzakirə olunub. Eyni zamanda, şəxsi marka məhsulları üzrə əməkdaşlıq, ixrac və logistika sahəsində dəstək imkanları, eləcə də “Xonça” istehsalat fabriki ilə birgə layihələr barədə fikir mübadiləsi aparılıb.
Müzakirələrdə həmçinin idxal olunan məhsul kateqoriyalarının genişləndirilməsi və gələcəkdə qarşılıqlı əməkdaşlığın inkişaf etdirilməsi istiqamətində potensial imkanlar dəyərləndirilib.
